கந்தர் அந்தாதி - செய்யுள் 47

திடம்படு கத்துங் கெடீர்கன்ம லோகச் சிலுகுமச்சோ

திடம்படு கத்துந் திரித்தம்பு வாலி யுரத்தும்பத்துத்

திடம்படு கத்துந் தெறித்தான் மருக திருகுமும்ம

திடம்படு கத்துங் கநகங் குனித்தவன் சேயெனுமே

பதம் பிரித்த வடிவம்:

திடம் படு உகத்தும் கெடீர்; கன்ம லோக சிலுகும்

(அச் சோ)திடம் படுகத்தும் திரித்து, “அம்பு வாலி உரத்தும் பத்து

திடம்படு கத்தும் தெறித்தான் மருக! திருகு மும்மதிள்

தம்படு உக துங்க நகம் குனித்தவன் சேய்!” எனுமே

பொருள்:

திடம் படு உகத்தும் கெடீர் – உறுதி நிலை அழியும் யுக இறுதியிலும் அழிவில்லாமல் இருப்பீர்கள்.

கன்ம லோக சிலுகும் அச் சோதிடம் படுகத்தும் திரித்து

கன்ம லோக சிலுகும் – பூர்வ வினையால் நமக்கு இவ்வுலகத்தில் ஏற்படும் மூ வேடணைகளையும் (மண், பெண், பொன்)

அச் சோதிடம் படு கத்தும் – ஓயாமல், கல்விச்செருக்கை அளிக்கும் சோதிட நூல்களைப் படித்துப் பிதற்றுவதையும்

திரித்து – மாற்றி

வினையால் உண்டாகும் மூவேடணைகளையும், செருக்கை அளிக்கும் சோதிட நூல்களைப் படித்துப் பிதற்றுவதையும் ஒழித்து,

அம்பு வாலி உரத்தும், பத்து திடம்படு கத்தும் தெறித்தான் மருக

அம்பு வாலி உரத்தும் – தன் பாணத்தை வாலியின் மார்பு மீதும்

பத்துத் திடம்படு கத்தும் – ராவணனது உறுதியான பத்துத் தலைகள் மீதும்

தெறித்தான் மருக – பிரயோகித்த ராமபிரானின் மருகனே!

[கைதான் இருபதுடையான் தலை பத்தும் கத்தரிக்க எய்தான் மருகன் – கந்தர் அலங்காரம்]

அம்பினை வாலியின் மீதும், ராவணனின் மீதும் பிரயோகித்த ராமபிரானின் மருகனே! என்றும்…

திருகு மும்மதிள் தம்படு உக துங்க நகம் குனித்தவன் சேய் எனுமே

திருகு மும்மதிள் – பகைகொண்ட முப்புரங்களையும்

தம்படு உக – தாம் தோன்றிய இடத்திலேயே விழுந்து அழியும்படி

[திரிபுரம் அதனை ஒரு நொடியதனில் எரிசெய்தருளிய சிவன் வாழ்வே – பொதுத் திருப்புகழ்]

துங்க நகம் – உயர்ந்த மேருமலையை

குனித்தவன் – வில்லாக வளைத்த சிவபெருமானின்

சேய் எனுமே – மைந்தனே என்று துதியுங்கள்

திரிபுரத்தை அழிக்க, மேருமலையை வில்லாக வளைத்த சிவபெருமானின் மகனே! என்றும் துதியுங்கள்

பொழிப்புரை:

அனைவரும் அழியும் யுக இறுதி காலத்திலும் அழியாமல் இருக்கவேண்டுமென்றால், மூவாசைகளையும் ஒழித்து, சோதிட நூல்களைப் படித்துப் பிதற்றுவதையும் விட்டு, வாலியையும் ராவணனையும் சம்ஹாரம் செய்த ஸ்ரீ ராமரது மருகனே! முப்புரங்களையும் நொடியில் சிரித்து எரித்தழித்த சிவனாரின் மகனே! என்று குமரனைத் துதியுங்கள்.